பாறைகளின் வகைபாடுகள்:

தீப்பாறைகள் : தீப்பாறைகள் புவியின் ஆழமானப் பகுதியிலிருந்து வெளியேறும் உருகிய பாறைக்குழம்பு உறைந்து உருவானவை. இப்பாறைகளிலிருந்து மற்ற பாறைகள் உருவாகின்றதால் இவற்றை முதன்மைப் பாறைகள் (Primary Rocks) அல்லது தாய்ப் பாறைகள் (Parent Rocks) என்று அழைக்கிறோம். தீப்பாறைகள் இரண்டு வகைகளாகப் பிரிக்கலாம். அவை 1. வெளிப்புறத் தீப்பாறைகள் 2. ஊடுருவிய தீப்பாறைகள்
1. வெளிப்புறத் தீப்பாறைகள்: புவியின் உட்பகுதியில் இருந்து அதன்மேல் பகுதிக்கு வரும் செந்நிற உருகிய பாறைக்குழம்பு லாவா (LAVA) எனப்படும். பாறைக்குழம்பு புவியின் மேற்பரப்பிற்கு வந்தவுடன் குளிர்ந்த பாறைகளாக மாறுகின்றன.
2. ஊடுருவிய தீப்பாறைகள்: பாறைக்குழம்பு புவிமேலோட்டிற்கு கீழே ஆழமான பகுதிகளில் உறைந்து உருவாகும் பாறைகள் ஊடுருவிய தீப்பாறைகள் எனப்படும்.
படிவுப்பாறைகள் : படிவுப்பாறைகள் அரிப்பு காரணிகளால் அரிக்கப்பட்டு படிய வைக்கப்பட்ட படிவுகள் நீண்ட காலமாக அதிக வெப்பம் மற்றும் அழுத்தத்தின் காரணமாக இறுகியதால் படிவுப்பாறைகள் உருவாகின்றன. இப்பாறைகள் பல அடுக்குகளைக் உள்ளடக்கியுள்ளன.
படிவுப்பாறைகள் மூன்று வகைகளாகப் பிரிக்கலாம். அவை, 1. உயிரினப் படிவுப்பாறைகள், 2. பௌதீக படிவுப்பாறைகள், 3. இரசாயன படிவுப்பாறைகள் ஆகும்.
1. உயிரினப் படிவுப்பாறைகள்: இவ்வகையான பாறைகள் இறந்து சிதைக்கப்பட்ட விலங்கின மற்றும் தாவர படிவுகள் இறுகித் தோன்றியதாகும். இவை உயிரினப் படிமங்களால் ஆனவை. (எ.கா.) சாக், பட்டுக்கல்
2. பௌதீக படிவுப்பாறைகள்: தீப்பாறைகளும் உருமாறிய பாறைகளும் சிதைந்து உருவாகின்றன. ஆறு, காற்று, பனியாறு போன்ற இயற்கைக் காரணிகளால் அரிக்கப்பட்டும், கடத்தப்பட்டும் அவை சாதகமான இடங்களில் படியவைக்கப்படுகின்றன. (எ.கா.) மணற்பாறைகள், களிப்பாறை -
3. இரசாயன படிவுப்பாறைகள் : பாறைகளில் உள்ள கனிமங்கள் நீரில் கரைந்து, இரசாயன கலவையாக மாறுகிறது. இவை ஆவியாதல் மூலமாக உருவாகின்றன. (எ.கா) ஜிப்சம்
உருமாறிய பாறைகள் : அதிக வெப்ப அழுத்தம் காரணமாக தீப்பாறைகளும் படிவுப்பாறைகளும் மாற்றமடைந்து உருமாறிய பாறைகள் என பெயர் பெறுகிறது. உருமாறியப் பாறைகள் இரண்டு காரணிகளால் உருவாகின்றன. அவை 1. வெப்ப உருமாற்றம், 2. இயக்க உருமாற்றம்.
1. வெப்ப உருமாற்றம்: பாறைக்குழம்பு பாறைகளில் ஊடுருவி செல்லும் போது அப்பாறைக்குழம்பின் வெப்பம், அங்குள்ள பாறைகளை உருமாற்றம் செய்கிறது. இது வெப்ப உருமாற்றம் எனப்படும்.
2. இயக்க உருமாற்றம்: பாறைக்குழம்பு பாறைகளில் ஊடுருவிச் செல்லும்போது அப்பாறைக் குழம்பின் அழுத்தத்தால், அங்குள்ள பாறைகளை உருமாற்றம் செய்கிறது. இது இயக்க உருமாற்றம் எனப்படும்.