காரணம்: தீபகற்ப இந்தியாவில் பாயும் மிக நீளமான ஆறு என்பதாலும் 3.13 இலட்சம் சதுர கி.மீ பரப்பளவு வடிநிலத்தைக் கொண்டுள்ளதாலும் மிகப்பெரிய டெல்டாவை உருவாக்கியுள்ளதாலும் கோதாவரி ஆறு விருத்தகங்கா என அழைக்கப்படுகிறது.

காரணம்: மருஸ்தலி என்ற சொல்லிற்கு "இறந்த நிலம்" (Land of Dead) என்று பொருள். இப்பாலைவனத்தின் கிழக்குப்பகுதியில் மணல் மேடுகள் நிறைந்துள்ளன. எனவே இப்பாலைவனம் மருஸ்தலி என்று அழைக்கப்படுகிறது.

காரணம்: இமயமலைகள், புவிமேலோட்டு பேரியக்க விசைகள் காரணமாக புவி மேலோடு மடிக்கப்பட்டு, மடிப்பு மலைகளாக உருவாகின.

	இமாத்ரி	இமாச்சல்
1	இமாத்ரி பெரிய இமயமலை என்றும் அழைக்கப்படுகிறது	இமாச்சல் சிறிய இமயமலை என்றும் அழைக்கப்படுகிறது.
2	இதன் சராசரி உயரம் 6000 மீ ஆகும்.	இதன் சராசரி உயரம் 3500 மீ முதல் 4500 வரை வேறுபடுகிறது.
3	இதன் சராசரி அகலம் 25 கி.மீ ஆகும்.	இதன் சராசரி அகலம் 80 கி.மீ ஆகும்.
4	இம்மலையில் மிக உயர்ந்த சிகரங்கள் காணப்படுகின்றன. எ.கா. எவரெஸ்ட் சிகரம், கஞ்சன் ஜுங்கா	இம்மலையில் கோடை வாழிடங்கள் காணப்படுகின்றன. எ.கா. சிம்லா, நைனிட்டால், டார்ஜ்லிங்.

	இமயமலை ஆறுகள்	தீபகற்ப ஆறுகள்
1	ஆற்றின் மத்திய மற்றும் கீழ்நிலைப் பகுதிகள் போக்குவரத்திற்கு ஏற்றது.	நீர்வழிப் போக்குவரத்திற்குப் பயன்படாதவை.
2	இமயமலையில் உற்பத்தி ஆகின்றன.	மேற்கு தொடர்ச்சி மலையில் உற்பத்தி ஆகின்றன.
3	இவை வற்றாத நதிகள் ஆகும்.	இவை வற்றும் நதிகள் ஆகும்.
4	இவை நீளமானவை மற்றும் அகலமானவை.	இவை குறுகலானவை மற்றும் நீளம் குறைந்தவை
5	மின்உற்பத்தி செய்ய இயலாத நிலை	நீர்மின் உற்பத்திக்கு ஏற்றது.

 நர்மதை, தபதி, சபர்மதி மற்றும் மாஹி ஆகிய நான்கு ஆறுகள் மட்டுமே கிழக்கிலிருந்து மேற்கு நோக்கிப் பாய்கின்றன.

தக்காண பீடபூமி:
1. தக்காண பீடபூமி, தீபகற்ப பீடபூமியில் அமைந்துள்ள மிகப் பெரிய இயற்கை அமைப்பைக் கொண்டதாகும். 
2. இது தோராயமாக முக்கோண வடிவம் கொண்டது.
3. வடமேற்கு திசையில் விந்திய, சாத்பூரா மலைத்தொடர்களையும் வடக்கில் மகாதேவ், மைக்காலா குன்றுகளையும், வடகிழக்கில் இராஜ்மகால் குன்றுகளையும், மேற்கில் மேற்கு தொடர்ச்சி மலைகளையும், கிழக்கில் கிழக்கு தொடர்ச்சி மலைகளையும் எல்லைகளாகக் கொண்டது.
4. இது சுமார் 7 லட்சம் சதுர கி.மீ பரப்பளவைக் கொண்டது. கடல் மட்டத்திலிருந்து 500 மீ முதல் 1000 மீ உயரம் வரையும் அமைந்துள்ளது.

1. இந்தியாவின் கிழக்கிலுள்ள அருணாச்சல பிரதேசத்தில் மேற்கிலுள்ள குஜராத்தைக் காட்டிலும் இரண்டு மணி முன்னதாகவே சூரியன் உதயமாகிறது.
2. இதனால் இந்த இரண்டு பகுதிகளுக்கும் உள்ள தலநேர வேறுபாடு 1 மணி 57 நிமிடம் 12 வினாடிகள் ஆகும்.
3. இந்த நேர வேறுபாட்டை தவிர்ப்பதற்காக, இந்தியாவின் மத்திய தீர்க்கரேகையான 82°30' கிழக்குத் தீர்க்கரேகையின் தலநேரம் இந்தியத் திட்டநேரமாக எடுத்துக்கொள்ளப்படுகிறது.
4. இத்தீர்க்கரேகை மிர்சாபூர் (அலகாபாத்) வழியாகச் செல்கிறது.
5. இந்தியத் திட்ட நேரமானது, கிரீன்விச் சராசரி நேரத்தை விட 5 மணி 30 நிமிடம் முன்னதாக உள்ளது.

தீபகற்ப இந்திய ஆறுகள்:
1. தென் இந்தியாவில் பாயும் ஆறுகள் தீபகற்ப ஆறுகள் எனப்படுகின்றன.
2. பெரும்பாலான ஆறுகள் மேற்குத் தொடர்ச்சி மலைகளில் உற்பத்தியாகின்றன.
3. இவை பருவகால ஆறுகள் அல்லது வற்றும் ஆறுகள் எனப்படுகின்றன.
4. நீரின் அளவு மழைப்பொழிவிற்கு ஏற்றாற்போல் மாறுபடுகிறது.
5. இவ்வாறுகள் செங்குத்து சரிவுடன் கூடிய பள்ளத்தாக்கு வழியே பாய்கிறது.
தீபகற்ப ஆறுகளை அவை பாயும் திசையின் அடிப்படையில் இரு பிரிவுகளாகப் பிரிக்கலாம். அவை
1. கிழக்கு நோக்கி பாயும் ஆறுகள்
2. மேற்கு நோக்கி பாயும் ஆறுகள்
கிழக்கு நோக்கி பாயும் ஆறுகள்:
மகாநதி, கிருஷ்ணா, கோதாவரி, காவேரி
அ) மகாநதி:
1. இந்நதி சத்தீஸ்கார் மாநிலத்திலுள்ள சிஹாவாவிற்கு அருகில் உற்பத்தியாகி ஒடிசா மாநிலத்தின் வழியாக 851 கி.மீ நீளத்திற்குப் பாய்கிறது. சீநாத், டெலன், சந்தூர், சித்ரட்லா, கெங்குட்டி மற்றும் நன் ஆகியவை இதன் முக்கிய துணையாறுகளாகும்.
2. மகாநதி பல கிளையாறுகளாகப் பிரிந்து இந்தியாவின் மிகப்பெரிய டெல்டாக்களை உருவாக்குகிறது.
3. இந்நதி வங்காள விரிகுடாவில் கலக்கிறது.
ஆ) கோதாவரி:
1. தீபகற்ப இந்தியாவில் பாயும் மிக நீளமான ஆறு கோதாவரியாகும்.
2. இது மகாராஷ்ட்ரா மாநிலம் நாசிக் மாவட்டத்தில் அமைந்துள்ள மேற்குத் தொடர்ச்சி மலையில் உற்பத்தியாகிறது.
3. இந்நதி விருத்தகங்கா எனவும் அழைக்கப்படுகிறது.
4. இது ஆந்திரபிரதேசம் வழியாக பாய்ந்து வங்காள விரிகுடாவில் கலக்கிறது. பூர்ணா, பென்கங்கா, பிரனிதா, இந்திராவதி, தால் மற்றும் சபரி போன்றவை இவற்றின் துணையாறுகள் ஆகும். இந்நதி ராஜமுந்திரிக்கு அருகில் கவுதமி மற்றும் வசிஸ்தா என இரண்டு கிளைகளாகப் பிரிந்து பெரிய டெல்டாவை உருவாக்குகிறது.
இ) கிருஷ்ணா:
1. இது தீபகற்ப ஆறுகளில் இரண்டாவது பெரிய நதியாகும்.
2. இந்நதி மகாராஷ்டிரா மாநிலத்தில் உள்ள மகா பலேஷ்வர் என்ற பகுதியில் ஊற்றாக உருவாகிறது.
3. இந்நதி ஆந்திரப்பிரதேசத்தின் வழியாகப் பாய்ந்து ஹம்சலாதேவி என்ற இடத்தில் வங்காள விரிகுடாவில் கலக்கிறது.
ஈ) காவேரி:
1. காவேரி ஆறு, கர்நாடக மாநிலத்தில் குடகு மலையிலுள்ள தலைக்காவேரியில் உற்பத்தியாகிறது.
2. இது தென் இந்தியாவின் கங்கை என்றும் அழைக்கப்படுகிறது. 
3. இந்நதி கர்நாடகாவில் இரண்டாகப் பிரிந்து சிவசமுத்திரம் மற்றும் ஸ்ரீரங்கப்பட்டினம் ஆகிய புனித ஆற்றுத் தீவுகளை உருவாக்குகிறது.
4. பின்பு தமிழ்நாட்டில் நுழைந்து தொடர்ச்சியான மற்றும் குறுகலான மலையிடுக்குகள் வழியாக கொள்ளிடம், மற்றும் காவேரி என இரண்டு பிரிவுகளாக பிரிந்து இறுதியில் பூம்புகார் என்ற இடத்திற்கு அருகில் வங்கக் கடலில் கலக்கிறது.
மேற்கு நோக்கி பாயும் ஆறுகள்:
அ) நர்மதை:
1. மத்தியபிரதேசத்தில் உள்ள அமர்கண்டாக் பீடபூமியில் உற்பத்தியாகிறது.
2. இது 27 கி.மீ நீளத்திற்கு ஒரு நீண்ட கழிமுகத்தை உருவாக்கி காம்பே வளைகுடா வழியாக அரபிக் கடலில் கலக்கிறது.
3. இது மேற்கு நோக்கி பாயும் ஆறுகளிலேயே நீளமானதாகும்.
ஆ) தபதி:
1. தபதி ஆறு தீபகற்ப இந்தியாவின் முக்கிய ஆறுகளில் ஒன்றாகும்.
2. இந்நதி மத்தியப் பிரதேசத்திலுள்ள முல்டாய் என்ற இடத்தில் உற்பத்தியாகிறது.
3. பின்பு காம்பே வளைகுடா வழியாக அரபிக்கடலில் கலக்கிறது.
4. தீபகற்ப இந்திய ஆறுகளில் நர்மதை, தபதி, சபர்மதி மற்றும் மாஹி ஆகிய நான்கு ஆறுகள் மட்டுமே கிழக்கிலிருந்து மேற்கு நோக்கி பாய்கின்றன.