முன்னுரை : நாடோடிகளாய் வாழ்ந்த மக்கள், பின்பு ஓர் இடத்தில் சமுதாயமாய் வாழத் தலைப்பட்டனர். அக்காலத்தில் தோன்றியது, மொழி. மக்கள் சமயம், குலம், தொழில் முதலியவற்றால் வேறுபட்டாலும் பேசும் மொழியால் ஒன்றுபடுகின்றனர்.
தாய்மொழியின் தனிச்சிறப்பு : குழந்தை தன் தாயின் கருவில் இருக்கும் போதே, அவள் வழியாய்த் தன் ஊனிலும் உயிரிலும் உள்ளத்திலும் மொழியினைப் பெற்றுக்கொள்கிறது. ஆதலால், இது குழந்தையின் தாய்மொழி எனப்படுகிறது.
அறிவுக்கண் கொடுக்கும் ஆசான் : தாயே குழந்தைக்கு முதல் ஆசிரியர். தாயிடம் மழலை பேசும் குழந்தை பள்ளிக்கூடத்தில் மொழியின் ஒலி, வரி வடிவங்களைக் கற்கின்றது. கல்வியுடன் மெய்யறிவு பெறுவதற்கும் உரிய மொழி, தாய்மொழி.
சிந்தனை, மொழி இரட்டைக் குழந்தைகள் : சிந்தனையையும் அதனை வெளிப்படுத்தும் மொழியையும் ஒன்றைவிட்டு ஒன்றைப் பிரிக்க இயலாது. சிந்தனையும் மொழியும் ஒருங்கே வளர்க்கப்பட வேண்டும். அதுவே மொழி வளர்ச்சிக்கு வழியாகும்.
உயர்தனிச் செம்மொழியே நம் தாய்மொழி! : தன் நாட்டின்கண் வழங்கும் பல மொழிகளுக்குத் தலைமை சான்ற உயர்மொழி; தனித்து இயங்கும் வல்லமை பெற்ற தனிமொழி; திருந்திய பண்பும் சிறந்த நாகரிகமும் பொருந்திய செம்மொழி, தமிழ். இதுவே நமது தாய்மொழி!
அறிவு வாயிலை அகலமாய்த் திறக்கும் ! : மொழியறிவு வளர வளர, இலக்கியச்சுவையுணர் ஆற்றலும், திறனாயும் பாங்கும் உண்டாகும்; இலக்கியப்பற்று, மொழிப்பற்று ஆகியவை உண்டாகும். கல்விக் கழகங்களை விட்டு நீங்கிய பிறகும் வாசிப்புத் தொடரும்.
அந்நியர் அகன்றனர்; அந்நிய மொழி தொடர்கிறது : நம்மை அடிமைப்படுத்திய ஆங்கிலேயரிடம் அலுவலகப்பணியில் சேர ஆங்கிலம் கற்றனர். ஆங்கிலத்தை ஒரு பாடமாய்க் கற்றுத் தேர்ச்சி பெறுவது தவறன்று. அனைத்தையும் ஆங்கிலத்தில் கற்கும் மோகம் இன்று பெருகிவிட்டது. ஒரு மொழியைக் கற்பது தவறன்று; அதற்கு அடிமை ஆவதே அவலம்.
தாய்மொழிக்கல்வி பற்றிக் காந்தியடிகளின் கருத்து : தேசத்தந்தை காந்தியடிகள், “இந்திய மக்களுள் சிலர் தாய்மொழியை மறந்தனர். ஆங்கிலப்படிப்பின்மீது நமக்கு மோகம் ஏற்பட்டுவிட்டது. ஆங்கிலக் கல்வியால் நாம் ஆண்மை இழந்துவிட்டோம்; அறிவும் குன்றிவிட்டது; பேடிகளாகிவிட்டோம்” என்று வருத்தப்படுகிறார்.
தாய்மொழியால் முடியும் : ஆங்கிலேயரிடமிருந்து நாடு விடுதலை பெற்றது. ஆனால், ஆங்கில மொழியிடம் இருந்து சிலர் விடுதலை பெறவில்லை. கருத்தை வெளிப்படுத்த உதவும் தாய்மொழி, கல்வி கற்கவும் உதவும். அனைத்து வகையான பாடங்களையும் தாய்மொழியான தமிழ்மொழியில் கற்க இயலும்.
முடிவுரை : தமிழ்ப்பற்று மிக்கோர் அனைவரும் ஒன்றுபடுவோம்! அனைத்துக் கல்வித்துறையிலும் தமிழ்வழிக் கல்வியை நிறுவுவோம்! அன்னைத்தமிழ், பன்முகச்சிறப்புப் பெறட்டும்! தமிழ் அன்னை உயர்புகழ் பெற உழைப்போம்!.

உறவுக்கு, அறிவுறுத்தலுக்கு, வேண்டுதலுக்கு, வணிகத்திற்கு என்று கடிதங்கள் எழுதுகையில், அவற்றின் மொழியாட்சி மாறுபடுகிறது. கடித வடிவில், சொல்ல வேண்டியவற்றை வெளியிடும் முறை உண்டு. பாரதியார், தாம் நேரில் பேசுவது போன்றே, கடிதத்தில் எழுத்து வடிவில் பேசிவிடுகிறார். இது, ஒரு வகையான புது உத்தியாகும்.
கடித இலக்கியம் :
கடிதங்களை இலக்கியமாக்கும் எழுத்தாளர்கள், மொழிக்கு அதன் வழியாகத் தனி அழகை உருவாக்கித் தருகிறார்கள். தனிப்பட எழுதும் கடிதங்களிலும் ஈர்க்கும் மொழியில் அழுத்தமான எண்ணங்களை, ஆழமான கருத்துகளைத் தந்து, அவற்றைப் பொதுவெளிக்குக் கொண்டு வருகிறார்கள்.
கடிதத் தாக்கங்கள் :
பண்டித நேரு, தம் மகளுக்கு எழுதிய கடிதங்கள், அறிஞர் அண்ணா தம் தம்பிமார்க்கு எழுதிய கடிதங்கள், அரசியலிலும் சமூகத்திலும் தாக்கங்களை ஏற்படுத்திப் புதுப்பாதைக்கு வழிவகுத்தன.
கற்பனையும் கருத்துச் செறிவும் :
நேரில் கண்டு அன்பைத் தெரிவிப்பதும், பாராட்டுவதும் மகிழ்ச்சியைத் தரவல்லன என்றாலும், கடிதம் மூலமாக உணர்த்துவது வெளிப்படுத்துவது என்பது, உள்மனத்தில் பதிய வைப்பது, உணர்ச்சி வயப்படுத்துவது. கற்பனைநயம், சொல்நயம், கருத்துநயம் அமைந்த கடிதங்கள், இலக்கிய வகையில் இடம் பெற்றுள்ளன. கண்டு பேசுவதிலும், காணாமல் கடிதத்தின் மூலம் கருத்துகளையும், கற்பனைகளையும், வருணனைகளையும் நிரம்பத் தரமுடியும் என்பதுவே உண்மை.

பொன்னிறப் பூக்காடு : மேற்கில் மாலையில் மறையும் கதிரவன் செந்நிற ஒளியால் வானத்தைச் செந்நிறமாக்கியது. அது செந்நிறப் பூக்கள் பூத்த பூக்காடு போல் விளங்குகிறது.
வருந்தி உழைக்கும் பாட்டாளி : வருந்தி உழைப்பதால் தொழிலாளர்களின் கரங்கள் சிவப்பேறியுள்ளன; தோள்களில் முத்துமுத்தாக வியர்வை தோன்றுகின்றது.
கவி பாட நீயே துணை : அந்திவானத்தின் செந்நிறக் காட்சி, உழைப்பாளர்களின் உழைப்பு ஆகியவற்றைப் பாடக் கிடைத்த செந்தமிழே எனக்குத் துணை.
சங்கத்தில் வீற்றிருந்த தமிழரசி : உள்ளத்து உணர்வுகளை வெளிப்படுத்தும் தமிழ், பல நூல்கள் உருவாகக் காரணமாக இருந்தது. சிறப்புமிக்க தமிழன்னை பாண்டியர் அமைத்த முச்சங்கங்களில் அரசியாய் கொலுவிருந்தாள்.
அந்த நாளும் வந்திடாதோ! : மொழியைப் போற்றி வளர்த்த புலவர்களும் அவர்களுக்கு ஆதரவளித்த பாரி உள்ளிட்ட வள்ளல்களும் அன்று வாழ்ந்தனர். அத்தகைய சிறப்புகள் மீண்டும் வரத் தமிழ்க்குயிலே கூவிடு.
சிங்கமே, தடைகளைத் தகர்த்திடு : சிங்கம் தன்னை அடைத்து வைத்திருக்கும் கூண்டினை உடைத்து வெளியேறும். அதுபோல் பொதிகை மலையில் தோன்றிய தமிழே, உன் வளர்ச்சிக்குத் தடையாய் இருப்பவற்றைத் தகர்த்திடு.

தலைமைத் தமிழாசிரியர்
வ.வேலுச்சாமியின்
சொல்லோவியங்கள்
(கவிதை நூல்)
வெளியீட்டு விழா
இடம் : நாடார் சரசுவதி உயர்நிலைப்பள்ளி, உசிலம்பட்டி
நாள் : 20-03-2019 நேரம் : மாலை - 4 மணி
நிகழ்ச்சி நிரல்

நாட்டுப்பண்
நன்றியுரை
அனைவருக்கும் அன்பு வணக்கம்.
தலைமையேற்ற இலக்கிய ஆர்வலரான என் பள்ளித் தலைமையாசிரியர், 'மாணவர்கள் அனைவரும் பள்ளிப் பாடங்களுடன் பைந்தமிழ் நூல்களையும் பல்வகைக் கலைகளையும் கற்றுச் சிறப்புற வேண்டும்' எனக் கூறுவார்கள். அத்தகைய நல்லுள்ளமும் இலக்கிய ஈடுபாடும் மிக்க தலைமை ஆசிரியர் அவர்களுக்கு மிக்க நன்றி.
தமிழைத் தமது இரு கண்களாய்ப் போற்றும் தொழிலதிபர் ஐயா திரு. இராஜேந்திரன் அவர்கள் தம் இராசியான திருக்கரங்களால் 'சொல்லோவியங்கள்' நூலினை வெளியிட்டுச் சிறப்புரை ஆற்றிச் சிறப்பித்தார்கள். அவர்களுக்கு என் பள்ளியின் சார்பில் நன்றியைத் தெரிவித்துக்கொள்கின்றோம்.
கவிதை நூலின் முதல் பிரதியைப் பெற்றுச் சிறப்பித்த ஐயா கவிஞர் பரமநாதன் அவர்கள், கவிதையில் சுவைத்த தம் கருத்துகளைச் சுருக்கமாய்க் கூறினார்கள். அவர்களுக்கும் என் நன்றி.
பல்வேறு பணிகளுக்கு இடையில், எங்கள் அன்பான அழைப்பை ஏற்று வந்தவர், ஐயா, எழுத்தாளர் திரு. குமரி அனந்தன் அவர்கள், எழுச்சிமிகு உரையால் மாணவர்களைத் தம் வசப்படுத்தி, நற்கருத்துகளை மாணவ மனங்களில் பதியச்செய்தார்கள். அவர்களுக்கு என் மனம் நிறைந்த நன்றி.
நாளும் வகுப்பில் சொற்களை மாணவர் மனங்களில் ஓவியமாய்ப் பதிவு செய்து வருபவர் என் பள்ளித் தலைமைத் தமிழாசிரியர் அவர்கள். அவர்கள் இயற்றிய "சொல்லோவியங்கள்” என்னும் நூலை நம் பள்ளியில் வெளியிட வாய்ப்பளித்த அவர்களுக்கும் என் நன்றி.
வரவேற்புரை நல்கி, விழா ஏற்பாடுகளை நெறிப்படுத்திய என் தமிழாசிரியர் ஐயா திரு. தமிழரசன் அவர்களுக்கும், தமிழ்த்தாய் வாழ்த்துப் பாடிய சகோதரிக்கும் நன்றி.
விழா நிகழ்வில் பங்கேற்ற பெரியோர்கள், மாணவ நண்பர்கள், ஆசிரியர்கள், அலுவலர்கள் அனைவருக்கும் நன்றி.
விழா நடத்த அனுமதி தந்த பள்ளி நிர்வாகத்தினருக்கும் ஒலி, ஒளி அமைத்துத் தந்த நண்பர்களுக்கும் நன்றி.
மீண்டும் அனைவருக்கும் நன்றி.

பொன்னிறப் பூக்காடோ! : மேற்கில், மாலையில் மறையும் கதிரவன் செந்நிற ஒளியால் வானத்தைச் செந்நிறமாக்கியது. அது செந்நிறப் பூக்கள் பூத்த பூக்காடு போல் விளங்குகிறது.
வருந்தி உழைக்கும் பாட்டாளி ! : வருந்தி உழைப்பதால் தொழிலாளர்களின் கரங்களில் சிவப்பேறியுள்ளது; தோள்களில் முத்துமுத்தாய் வியர்வை தோன்றுகின்றது.
கவி பாட நீயே துணை ! : அந்திவானத்தின் செந்நிறக்காட்சி, உழைப்பாளர்களின் உழைப்பு ஆகியவற்றைப் பாடக் கிடைத்த செந்தமிழே எனக்குத் துணை.
சங்கத்தில் வீற்றிருந்த தமிழரசி ! : உள்ளத்து உணர்வுகளை வெளிப்படுத்தும் தமிழ், பல நூல்கள் உருவாகக் காரணமாய் இருந்தது. சிறப்புமிக்க தமிழ், பாண்டியர் அமைத்த முச்சங்கங்களில் அரசியாய் கொலுவிருந்தது.
அந்த நாளும் வந்திடாதோ ! : மொழியைப் போற்றி வளர்த்த புலவர்களும், அவர்களுக்கு ஆதரவளித்த பாரி போன்ற வள்ளல்களும் வாழ்ந்தனர். அத்தகைய சிறப்புகள் மீண்டும் வரத் தமிழ்க்குயிலே கூவிடு.
சிங்கமே, தடைகளைத் தகர்த்திடு ! : சிங்கம் தன்னை அடைத்து வைத்திருக்கும் கூண்டினை உடைத்து வெளியேறும். அதுபோல், பொதிகை மலையில் தோன்றிய தமிழே, உன் வளர்ச்சிக்குத் தடையாய் இருப்பவற்றைத் தகர்த்திடு.

1. சிலர் நம்மைவிட அறிவிலும் பொருளிலும் வலிமை குறைந்தவராய் இருப்பர்.
2. அவர்களுக்குக் கைகொடுத்து உதவி நமக்குச் சமமாக்க வேண்டும்.
3. இதுவே நாம் வலிமை பெறுவதற்கான வழி என்கிறார், பாரதியார்.

அ) அவையெல்லாம் - அவை + எல்லாம்
i) இ ஈ ஐ வழி யவ்வும் என்ற விதிப்படி
ய் - உடம்படு மெய் தோன்றியது
அவை + ய் + எல்லாம்
ii) உடல் மேல் உயிர் வந்து ஒன்றுவது இயல்பே என்ற விதிப்படி
ய் + எ = 'யெ' ஆனது
= அவையெல்லாம்
= என்று புணர்ந்தது