ஆழிப்பேரலைகள் : சுனாமி என்பது துறைமுக அலைகளைக் குறிக்கும் ஜப்பானியச் சொல்லாகும். கடலடியில் தோன்றும் புவிஅதிர்ச்சி, எரிமலைச் செயல்பாடு மற்றும் கடலோரப் பகுதிகளில் நடைபெறும் மிகப்பெரிய நிலச்சரிவுகள் ஆகியவற்றால் கடலில் பெரிய அலைகள் உருவாகின்றன. இவ்வலைகள் சராசரியாக மணிக்கு 500 கிலோ மீட்டர் வேகத்தில் பயணிக்கும். இவ்வலைகளின் நீளம் 600 கிலோ மீட்டருக்கும் அதிகமாக இருக்கும். இந்த அலைகள் கடற்கரையை அடையும்போது 15 மீ உயரம் வரை உயர்ந்து காணப்படும். இவை கடற்கரையோரப் பகுதியில் அதிகமான சேதத்தை ஏற்படுத்தும்.

பாறைக்கோளத்தின் ஒரு பகுதி மண்கோளம் ஆகும். இது மண் மற்றும் தூசுகளால் ஆனது. பாறைக்கோளம், நீர்க்கோளம் மற்றும் வாயுக் கோளம் மற்றும் உயிர்க்கோளம் சந்திக்குமிடத்தில் மண்கோளம் காணப்படுகிறது.

தீப்பாறைகளை முதன்மைப் பாறைகள் அல்லது தாய்ப்பாறைகள் என்றும் அழைக்கப்படுகின்றன. ஏனென்றால் மற்ற பாறைகள் நேரடியாகவோ அல்லது மறைமுகமாகவோ இப்பாறைகளில் இருந்தே உருவாகின்றன. 

நாம் வாழும் புவியின் மேலடுக்கு புவிமேலோடு ஆகும். புவிமேலோடு திடமாகவும், இறுக்கமாகவும் உள்ளது. புவிமேலோட்டிற்கு கீழேயுள்ள பகுதி கவசம். கவசத்தின் மேற்பகுதியில்  திடமாகவும், கீழ்ப்பகுதியில் உருகிய நிலையிலும் காணப்படுகின்றன. எனவே புவிமேலோடு கவசத்தின் மீது மிதக்கின்றது.

எரிமலை செயல்படும் / வெடிக்கும் காலத்தை அடிப்படையாகக் கொண்டு அவற்றை மூன்று வகைகளாகப் பிரிக்கலாம். அவை,
அ) செயல்படும் எரிமலை (Active Volcano )
ஆ உறங்கும் எரிமலை ( Dormant Volcano )
இ தணிந்த / செயலிழந்த எரிமலை ( Extinct Volcano )
அ) செயல்படும் எரிமலை:
நிரந்தரமாக தொடர்ந்து எரிமலைக் குழம்புகளையும், துகள்களையும், வாயுக்களையும் வெளியேற்றிக் கொண்டே இருக்கும் எரிமலைகள் செயல்படும் எரிமலைகள் எனப்படுகின்றன (எ.கா) செயின்ட் ஹெலன்ஸ் எரிமலை - அமெரிக்க ஐக்கிய நாடுகள்.
ஆ) உறங்கும் எரிமலை:
(i) நீண்ட காலமாக எரிமலைச் செய்கைகள் ஏதும் இல்லாமல் காணப்படும் எரிமலைகள் உறங்கும் எரிமலைகள் எனப்படும்.
(ii) இவை திடீரென்று வெடிக்கும் தன்மையுடையது.
(iii) இவ்வாறான எரிமலைகள் வெடிக்கும் பொழுது அதிகமான உயிர்ச்சேதமும், பொருட்சேதமும் ஏற்பட வாய்ப்புகள் உள்ளன. (எ.கா.) ஃபியூஜி எரிமலை - ஜப்பான்.
இ) தணிந்த / செயலிழந்த எரிமலை:
எந்தவித எரிமலைச் செயல்பாடுகளுமின்றி காணப்படும் எரிமலைகள் தணிந்த / செயலிழந்த எரிமலைகள் ஆகும். (எ.கா.) கிளிமஞ்சாரோ எரிமலை - தான்சானியா.